नवलपरासी । विकू बचत तथा ऋण सहकारी संस्था लि. नवलपरासीको ३३औं वार्षिक साधारण सभाको पहिलो इकाइ केन्द्र आज कावासोतीमा सम्पन्न गरेको छ ।

साकोसका अध्यक्ष ओम प्रसाद सापकोटाको अध्यक्षतामा सुरु भएको इकाइ केन्द्र–१ को सभामा साकोसका उपाध्यक्ष यमुनाथ आचार्यले स्वागत मन्तव्य व्यक्त गर्नुभएको थियो । 

कार्यक्रममा गत वर्षको प्रगति प्रतिवेदन र चालु आर्थिक वर्षको वार्षिक नीति तथा कार्यक्रम संस्थाका सचिव प्रेम प्रसाद सापकोटाले र गत वर्षको आर्थिक विवरण र चालु आर्थिक वर्षको वार्षिक वजेट संस्थाका कोषाध्यक्ष कालीदास गौडेलले प्रस्तुत गर्नुभएको थियो ।

त्यसैगरी लेखा सुपरिवेक्षण समितिको वार्षिक प्रतिवेदन संयोजक कमल सुवेदीले प्रस्तुत गर्नुभएको थियो भने पूर्व अध्यक्ष एंव सञ्चालक समितिका सदस्य ईन्द्रराज ज्योति पौडेलले जगेडा कोषको बारेमा सदस्यहरुलाई जानकारी गराउनुभएको थियो ।

कार्यक्रममा सञ्चालक समिति, विभिन्न उप–समितिका पदाधिकारीहरु र शेयर सदस्यहरुको  उत्साहजनक सहभागिता रहेको थियो । कार्यक्रममा साकोसका वित्तीय तथा गैर वित्तीय कार्यक्रममा सहभागी उत्कृष्ट सदस्य तथा संघ संस्थाहरुलाई सम्मान तथा पुरस्कार प्रदान गरिएको थियो । 

कार्यक्रम सहजीकरण साकोसका प्रमुख कार्यकारी अधिकृत माधव प्रसाद पौडेलले गर्नुभएको थियो । वार्षिक साधारणसभाको दोस्रो ईकाइ सभा बुधबार देवचुलीमा सञ्चालन हुने साकोसले जनाएको छ ।