काठमाडौं । कोलमतेश्वर बचत तथा ऋण सहकारी संस्था लि. काठमाडौंको १७औं वार्षिक साधारणसभा असोज २९ गते, शनिवार सम्पन्न भएको छ । साकोसका अध्यक्ष शिवहरी पौडेलको अध्यक्षतामा आयोजित सभाको उद्घाटन प्रमुख अतिथि नेफ्स्कूनका बरिष्ठ उपाध्यक्ष चन्द्र प्रसाद ढकालले गर्नुभएको थियो । सभामा स्थानीय अन्य सहकारी संस्थाका अध्यक्षहरु, नागरिक अगुवाहरु सहित शेयर सदस्यहरुको उत्साहजनक सहभागिता रहेको थियो । 

प्रमुख अतिथि ढकालले सभालाई सम्बोधन गर्दै सहकारीका समसामयिक समस्या तथा चुनौतिहरु र तिनका समाधानका उपायहरुबारे सुझाउनुभएको थियो । सुशासित सहकारी सञ्चालनका मार्गदर्शनहरु बारे प्रष्ट पार्दै उपाध्यक्ष ढकालले बचत तथा ऋण सहकारी अभियानको सुदृढीकरणका लागि नेफ्स्कूनले अगाडि सारेका कार्यक्रमसँग आवद्ध रहन र अन्य समस्या तथा चुनौति निकारकरणका लागि समेत नेफ्स्कूनको पहलकदमीका लागि झक्झक्याइरहन अनुरोध गर्नुभएको थियो । 

साधारणसभामा बार्षिक प्रगति प्रतिवेदन साकोसका सचिव विन्दु पुडासैनी सिंखडाले प्रस्तुत गर्नुभएको थियो । साकोसमा हाल ४ हजार ५ सय शेयर सदस्य रहेको प्रस्तुतीका क्रममा जानकारी गराइएको थियो । कोषध्यक्ष ईश्वर कृष्ण घिमिरेले साकोसको आर्थिक प्रतिवेदन प्रस्तुत गर्दै कुल २९ करोड ५० लाख रुपैंयाको कारोबार गर्न साकोस सफल भएको जानकारी गराउनुभएको थियो । 
साकोसमा करिब २२ करोड बचत संकलन र करिब २१ करोड ऋण लगानी रहेको जनाइएको छ । मुख्य कार्यालय सहित गोठाटारमा एक सेवा केन्द्र सञ्चालनमा रहेको साकोसले सदस्य बृद्धिको लक्ष्यलाई अगाडि सार्दै साँखुमा सेवा केन्द्र विस्तार गर्ने योजना बनाएको छ । 

साकोसका लेखा सुपरिवेक्षण समितिका संयोजक हेमन्त प्रसाद दाहालले लेखा सुरपरिक्षेण समितिको प्रतिवेदन प्रस्तुत गर्नुभएको थियो । 

साधारणसभामा जेष्ठ नागरिक शेयर सदस्य, उत्कृष्ट बचतकर्ता, उत्कृष्ट ऋणि, असल कारोबारी र उत्कृष्ट विद्यार्थीहरुलाई सम्मान तथा पुरस्कार प्रदान गरिएको थियो । सदस्य क्रियाशिलताका कार्यक्रमलाई जोड दिने लक्ष्यका साथ साकोसले शेयर सदस्यहरुलाई सहकारी अवलोकन भ्रमण, बृद्ध सदस्यहरुलाई तीर्थाटन लगायतका कार्यक्रम गर्ने जनाएको छ ।