तनहुँ । भानु नगरपालिकासँग नेफ्स्कून र स्थानीय निकाय बीचको संयुक्त साझेदारीमा सञ्चालन हुने ‘आधारशिला’ कार्यक्रम कार्यान्वयन सम्झौता भएको छ । कार्यक्रमको कार्यान्वयन सम्झौता सँगै अब नगरपालिका भित्र सञ्चालित  सहकारीहरुको जागरण तथा विकासको चरण सुरु भएको छ । 

नेपाल बचत तथा ऋण केन्द्रीय सहकारी संघ लि.(नेफ्स्कून) ले स्थानीय तहको मातहतमा रहेका, ग्रामिण र दुर्गम क्षेत्रमा सञ्चालित सबै प्रकृतिका सहकारीहरुलाई लक्षित गरी सुरु गरेको आधारशिला कार्यक्रम अन्तर्गत नगरपालिकासँग कार्यक्रम कार्यान्वयन सम्झौता भएको हो । 

नगरपालिकाको कार्यालयमा असोज ३१ गते, सोमबार आयोजित कार्यक्रममा प्रमुख प्रशासकीय अधिकृत दीपक प्रसाद खतिवडा र नेफ्स्कूनका बरिष्ठ कार्यक्रम अधिकृत भरत प्रसाद न्यौपानेले सम्झौतामा हस्ताक्षर गर्नुभएको थियो । कार्यक्रम भानु नगरपालिकाका नगर प्रमुख आनन्दराज त्रिपाठीको विशेष उपस्थितिमा भएको थियो । नगरपालिकाको कार्यक्षेत्र भित्र विभिन्न प्रकृतिका ६३ सहकारी छन । 

आधारिशला कार्यक्रम स्थानीय निकायहरुसँगको समन्वय र सहकार्यमा सबै प्रकृतिका सहकारीहरुको सशक्तिकरण गर्ने नेफ्स्कूनको नयाँ कार्यक्रम हो । आधारशिला कार्यक्रमको लोकप्रियता पछिल्लो समय बढ्दै गइरहेको छ । स्थानीय तहहरु पनि नेफ्स्कूनले सञ्चालन गरेको यो कार्यक्रममा सहभागिता जनाउँदै आफ्नो क्षेत्रका सहकारीहरुको जागरण, विकास, प्रवर्धन र सञ्जालीकरणका लागि क्रियाशिल देखिएका छन् ।