काठमाडौं । विन्धवासिनी बचत तथा ऋण सहकारी संस्था लि. काभ्रेका नवनिर्वाचित अध्यक्ष शान्त कुमार श्रेष्ठलाई नेफ्स्कूनका अध्यक्ष परितोष पौड्यालले बधाई एवम् शुभकामना प्रदान गर्नुभएको छ । आज संघको केन्द्रीय कार्यालयमा आयोजित एक भेटघाटका क्रममा बधाई दिँदै अध्यक्ष पौड्यालले बचत तथा ऋण सहकारी अभियानमा विन्धवासिनी साकोसको उचाई उहारहणीय रहेको र यसलाई अझ वृद्धि विकास गर्दै अगाडि बड्न नवनिर्वाचित टीम सक्षम हुने विश्वास व्यक्त गर्नुभयो । 

असोज ७ र ८ गते सम्पन्न वार्षिक साधारणसभाबाट अध्यक्षमा निर्वाचित श्रेष्ठ २०५२ सालदेखि साकोसको विभिन्न पदमा सेवारत हुनुहुन्छ । 

नवनिर्वाचित अध्यक्ष श्रेष्ठले विन्धवासिनी साकोसको छवि निर्माणमा सहयोग पुर्याउने आदरणीय शेयर सदस्यहरु र अन्य बाल बचत सदस्यहरु नै साकोस विकासको मुल आधार रहेको बताउनुभयो । उहाँले सदस्य नै सहकारीको मुख्य पात्र भएको हुँदा साकोसले सँधै सदस्य सन्तुष्टी, सुशासन र सुरक्षित विकासमा ध्यान दिने स्पष्ट पार्नुभयो । “समृद्ध सदस्य, सुरक्षित र दिगो साकोस” भन्ने मुल थिमलाई सर्वोपरि मानी आर्थिक वर्ष २०८१/०८२ सम्ममा १ लाख ५ हजार शेयर सदस्य र १० अर्व पुँजी पुर्याउने रणनीतिक लक्ष्य साकोसको रहेको उहाँले बताउनुभयो ।

संक्षिप्त भेटघाटका क्रममा नेफस्कूनका प्रमुख कार्यकारी अधिकृत प्रकाश प्रसाद पोखरेल र विन्धवासिनी साकोसका प्रमुख कार्यकारी अधिकृत के.बी. लामाको उपस्थिति थियो ।