काठमाडौं । राष्ट्रिय सहकारी महासंघको ३०औं बार्षिक साधारणसभा बुधबार सम्पन्न भएको छ । महासंघका अध्यक्ष मिनराज कंडेलको अध्यक्षतामा आयोजित सभाको उद्घाटन राष्ट्रिय सभाका अध्यक्ष गणेश प्रसाद तिमिल्सिनाले गर्नुभएको थियो । 

उद्घाटन कार्यक्रममा पूर्व मन्त्री तथा निवर्तमान अध्यक्ष केशव बडाल, भूमि व्यवस्था, सहकारी तथा गरिवी निवारण मन्त्रालयका सचिव डा. दामोदर रेग्मी, सहकारी विभागका रजिष्ट्रार रुद्रप्रसाद पण्डितले सम्बोधन गर्नुभएको थियो । महासंघका उपाध्यक्ष रमेश पोखरेलले स्वागत मन्तव्य राख्नुभएको थियो । 

सभालाई सम्बोधन गर्दै प्रमुख अतिथि राष्ट्रिय सभाका अध्यक्ष तिमिल्सिनाले सहकारीलाई अप्ठेरो परेको कानुन संसोधनमा सहजिकरण गर्न आफु तयार रहेको प्रतिवद्धता व्यक्त गर्नुभएको थियो  । सहकारी अभियानले कानुन संशोधन गर्न विद्ययेक ल्याएमा त्यसलाई दर्ता गरी अगाडी बढाउन आफुले सहजिकरण गर्ने अध्यक्ष तिमिल्सिनाको भनाई थियो । उहाँले सहकारी क्षेत्रमा ५६ प्रतिशत महिला सहभागिता भएपनि नेतृत्व तहमा महिलाको उपस्थिति कम रहेकोतर्फ संकेत गर्दै अभियानको नेतृत्व तहमा महिला सहभागिता बृद्धि गर्नुपर्नेमा जोड दिनुभयो ।

भूमि व्यवस्था, सहकारी तथा गरिवी निवारण मन्त्रालयका सचिव डा. दामोदर रेग्मीले सहकारीको वित्तीय कारोबारमा जोखिम रहेको उल्लेख गर्दै यसलाई सुरक्षित, पारदर्शी र जोखिमरहित बनाउनुपर्ने आवश्यकता औल्याउनुभयो । उहाँले सहकारी अभियान र सहकारी मन्त्रालय एउटै डुङ्गामा उभिएकाले अभियान सफल हुँदा मन्त्रालय पनि सफल हुने बताउँदै अभियानलाई भरोसायोग्य क्षेत्रका रुपमा रुपान्तरण गर्न सबै लाग्नुपर्नेमा जोड दिनुभयो । 

विभागका रजिष्ट्रार रुद्रप्रसाद पण्डितले सहकारी एकीकरणलाई अभियानका रुपमा अगाडि बढाउनुपर्ने बताउनुभयो । 

कार्यक्रममा महासंघका निवर्तमान अध्यक्ष केशव बडालले स्वायत्तता र स्वतन्त्रता सहकारीको मुटु भएको बताउँदै राज्यसँग हालेमालो गरेर अभियान अगाडि बढ्ने बताउनुभयो । पूर्व अध्यक्ष दिपक प्रकाश बाँस्कोटाले नेपालको संविधानमा सार्वजनिक, निजी सरह सहकारीलाई समान अवसर दिएको, जुन कुरा विश्वका विभिन्न देशले अनुसरण गर्न थालेको बताउनुभयो । 

महासंघका अध्यक्ष कडेलले सहकारी अभियानले दिगो विकासका लक्ष्यहरु प्राप्तिका लागि योगदान गर्ने उल्लेख गर्नुभयो । उहाँले सहकारी क्षेत्रलाई विद्यमान संकटबाट बचाउन राज्यले तरलता व्यवस्थापनमा सहयोग गर्नुपर्ने भनाइ राख्नुभएको थियो । 

सभामा महासंघका महाप्रबन्धक चित्राकुमारी थाम्सुहाङ सुब्बाले कार्यक्रमको सहजीकरण गर्नुभएको थियो । साधारण सभामा महासंघका अध्यक्ष मिनराज कडेलले बार्षिक प्रतिवेदन प्रस्तुत गर्नुभएको थियो । लेखा सुपरिवेक्षण समितिका संयोजक धर्मदत्त देवकोटाले लेखा सुपरिवेक्षण समितिको प्रतिवेदन प्रस्तुत गर्नुभएको थियो भने आ.व. २०७९/०८० को बार्षिक कार्यक्रम तथा बजेट महासंघका महाप्रबन्धक सुब्बाले प्रस्तुत गर्नुभएको थियो ।