बिराटनगर । नेपाल बचत तथा ऋण केन्द्रीय सहकारी संघ (नेफ्स्कून) का बरिष्ठ उपाध्यक्ष चन्द्रप्रसाद ढकालले सहकारी अभियानको नेतृत्व गर्ने व्यक्तिले व्यक्तिगत स्वार्थ भन्दा माथि उठ्नुपर्ने बताउनुभएको छ ।  सहकारी अभियान व्यक्तिगत अभिष्ट पूरा गर्ने थलो नभएको स्पष्ट पार्नुभयो । सहकारी अभियान विशुद्ध सामाजिक अभियान भएकोले निस्वार्थ सेवा गर्ने उद्देश्यले मात्र यो क्षेत्रमा आउनुपर्नेमा उहाँले जोड दिनुभयो । 

मोरङको कानेपोखरीस्थित रमाइलो जनएकता बचत तथा ऋण सहकारी संस्थाको असोज २७ गते आयोजित एकीकरण पछिको दोश्रो बार्षिक साधारण सभाका विशिष्ट अतिथि नेफ्स्कून बरिष्ठ उपाध्यक्ष ढकालले अभियानले स्वार्थ भएका र नभएका व्यक्तिहरु खुट्याउनुपर्ने उल्लेख गर्नुभयो । बरिष्ठ उपाध्यक्ष ढकालले स्वार्थ राख्नेहरुका लागि सहकारीमा स्थान नहुने भन्दै सहकारी अभियन्ताहरुले बिनासर्त सदस्य संघ संस्था र सदस्यका लागि काम गर्नुपर्ने बताउनुभयो । सहकारी क्षेत्रमा पछिल्लो समय विद्यमान समस्याले पनि स्वार्थरहित अभियन्ताको आवश्यकतालाई थप प्रष्ट पारेको उहाँको भनाइ थियो । उहाँले नेतृत्व पुनर्जागरण, रुपान्तरण र परिवर्तन सबैको आशय एउटै भएको प्रष्ट पार्दै परिवर्तनको  लागि खुट्टा कमाउने प्रवृत्तिले ब्यक्तिगत स्वार्थ लुकेको देखिने बताए ।

मोरङको सहकारी अभियानले सिङ्गो मुलुककै सहकारी अभियानलाई दिशानिर्देश गरेकोले यो अभियानलाई कसैले पनि भुल्न नमिल्ने उहाँले बताउनुभयो । साधारण सभा संस्थाका अध्यक्ष त्रिभुनाथ फुयलको अध्यक्षता तथा मोरङ क्षेत्र नं ३ का सांसद डा सुनिल शर्माको प्रमुख आतिथ्यतामा सम्पन्न भएको थियो ।