गोरखा । ११४औं अन्तर्राष्ट्रिय महिला दिवस तथा महाशिवरात्रीको अवसर पारेर गोरखा नगरपालिका १० स्थित बिरिञ्चोक बिरेडाँडामा रहेको गण्डकी महिला बचत तथा ऋण सहकारी संस्था लि.ले फागुन २५ गते संस्थाको भवन परिसरमा निःशुल्क महिला स्वास्थ्य शिविर सञ्चालन गरेको छ ।

शिविरमा १ सय ८० जनाले गराए स्वास्थ्य परीक्षण गराएको संस्थाकी प्रबन्धक सिर्जना कोइरालाले जानकारी गराउनुभयो । वडा कार्यालयको सहयोग तथा संगम मेडिहेल्थ क्लिनिकको प्राविधिक सहयोगमा साकोसले ३१औं स्थापना दिवसको अवसर पारेर उक्त कार्यक्रम आयोजना गरिएको हो ।

बरिष्ठ महिला रोग विशेषज्ञ डा. सुनिता व्यञ्जनकार नेतृत्वको १० सदस्यीय स्वास्थ्यकर्मीको टोलीले निःशुल्क परिक्षणसँगै औषधी पनि निःशुल्क वितरण गरेको थियो । महिलाहरुको पाठेघर स्क्रिनिङ, भिआईए जाँच, डेन्टल एण्ड जेनेरल ओपीडीसम्बन्धी उपचार गरिएको थिया । उक्त शिविरमा १ सय ९ महिलामा भिडियो एक्सरे, २५ जनाले भीआईए, ५० जनाले डेन्टल र ८६ जना महिलाले जेनेरल ओपीडी सेवा लिएको बरिष्ठ स्वास्थ्यकर्मी संगम श्रेष्ठले जानकारी गराउनुभयो । १ सय ८० जना महिलाको स्वास्थ्य परिक्षण गराउँदा ५० प्रतिशत महिलामा उच्चरक्तचाप, मोटोपना देखिएको छ ।