काठमाडौं । बचत तथा ऋण सहकारी अभियानको दिगोपनाका लागि सञ्जाल साझेदारीलाई सशक्त र प्रभावकारी बनाउनुपर्ने धारणा अभियानकर्मीहरुले व्यक्त गर्नुभएको छ । बदलिदो परिस्थिति अनुसार सञ्जाल साझेदारीको विषयलाई उच्च प्राथमिकता सहित सबै गोलबद्ध भएर अघि बढ्दा साकोस अभियान थप सशक्त  भएको सकारात्मक सन्देश प्रवाह हुने भन्दै यसको सुदृढीकरणमा बिशेष जोड दिइएको हो ।

नेफ्स्कूनले आज काठमाडौं भक्तपुर, ललितपुर र काभ्रे जिल्ला बचत ऋण सहकारी संघसँग गरेको अन्तरक्रिया कार्यक्रमका सहभागीहरुले सञ्जाल साझेदारीले सहकार्य, एकता, समन्वय र हार्दिकताको सन्देश प्रवाह गर्ने भन्दै समयको माग पनि यही रहेको धारणा राख्नुभएको थियो ।

साकोस अभियानलाई बलियो बनाउनुपर्ने विषयमा कुनै दुईमत नरहेको भन्दै सहभागीहरुले नेफ्स्कून बलियो हुँदा अभियान बलियो हुनेमा जोड दिनुभएको थियो । यस्तै, केन्द्रीय संघले पनि आफ्ना सदस्य संघहरुको स्थायित्व र दिगोपनाका विषयमा सोच्नुपर्ने बताउनुभएको थियो । यसै विषयको समूचित सम्बोधन नै सञ्जाल व्यवस्थापन भएको धारणा व्यक्त भएको थियो ।

सञ्जाल साझेदारीको उद्देश्य र आशय अभियानको सशक्तिकरण भएकोमा सहभागी सबैको एकमत रहेको थियो । सबैको ‘स्पिड’ र ‘स्पिरिट’ समान बनाउने काममा आजको छलफल उपयोगी भएको विश्वास सहभागीहरुको थियो । हिजोका कमजोरीहरु सुधार्दै सही अर्थमा सञ्जाल व्यवस्थापनमार्फत साकोस अभियानलाई दिगो बनाउनुपर्ने विचार सहभागीहरुको थियो ।

सञ्जाल व्यवस्थापन नेफ्स्कूनको रणनीतिक महत्वको विषय भएको भन्दै यसका लागि बारम्बार छलफल र अन्तरक्रिया आयोजना गरिएको जानकारी गराइएको थियो । आगामी दिनमा पनि थप छलफलहरुमार्फत सर्वस्वीकार्य निचोडमा पुग्ने विश्वास नेफ्स्कूनले दिलाएको छ ।  

आजको अन्तरक्रियामा नेफ्स्कूनका अध्यक्ष चन्द्रप्रसाद ढकाल, कोषाध्यक्ष दिपक थापा, काठमाडौं जिल्ला बचत तथा ऋण सहकारी संघ लि.का अध्यक्ष दिपक पनेरु,  भक्तपुर जिल्ला बचत तथा ऋण संघ लि. का अध्यक्ष कृष्ण गोविन्द लाखाजु, काभ्रे जिल्ला बचत तथा ऋण सहकारी संघ लि.का अध्यक्ष उदयराम कायस्थ तथा ललितपुर जिल्ला बचत तथा ऋण सहकारी संघ लि.का सचिव श्यामकृष्ण महर्जन सहभागी हुनुभएको थियो । यस्तै नेफ्स्कूनका प्रमुख कार्यकारी अधिकृत डा. शिवजी सापकोटा, सहायक कार्यकारी अधिकृत सञ्जयराज तिमिल्सिना तथा बरिष्ठ सहायक मनोहर आचार्य सहभागी हुनुभएको थियो ।