श्रावण १७, हरिवन सर्लाही । सगुन बचत तथा ऋण सहकारी संस्था लि. हरिवनले २५ औं गौरवमय बर्ष (रजत जयन्ती) को अवसर पारेर यो वर्षभर २५ सामाजिक क्रियाकलाप गर्ने भएको छ । जसअनुसार हिजो  हाजिरी जवाफ प्रतियोगिता सम्पन्न गरेको छ ।  

रजत जयन्तीको अवसरमा बर्षभर २५ सामाजिक क्रियाकलाप गर्ने संस्थाको निर्णय बमोजिम आयोजित माध्यमिक विद्यालय (९–१२) स्तरीय हाजिरी जवाफ प्रतियोगितामा जिल्लाभरका १५ विद्यालयको  सहभागिता थियो । कार्यक्रमा सहभागी विद्यार्थीहरुलाई तिनवटा राउन्डमा प्रतिस्पर्धा गराइएको थियो ।

संचालक, लेखा सुपरिवेक्षण समिति सदस्यहरुको सक्रिय सहभागितामा संस्थाका अध्यक्ष केशव प्रसाद ढकालको अध्यक्षतामा भएको उद्घाटन सत्रको कार्यक्रमा उपाध्यक्ष तारादेवी सुवेदीले उपस्थित सम्पुर्णमा स्वागत मन्तब्य, कोषाध्यक्ष बिनोद कार्कीले वित्तीय विश्लेषण, संस्थापक अध्यक्ष बाबुराम घिमिरेले सहकारी इतिहास बारे जानकारी गराउनु भएको थियो ।

कार्यक्रम संचालन सचिव राज कुमार उप्रेतीले संचालन गर्नु भएको थियो । शिक्षक पुष्प राज श्रेष्ठले सहजीकरण गर्नुभएको दोस्रो सत्रमा पहिलो राउन्ड जेनरल राउन्ड (सगुन सहकारी र सहकारी क्षेत्र) बारे ज्ञान, दोस्रो राउन्ड विषयगत राउन्ड (भुगोल, इतिहास, आईक्यू, सूचना प्रविधि, समसामयिम ज्ञान), तेस्रो राउण्ड (र्यापिड फायर) गरी प्रतिस्पर्धा गराइएको थियो ।

श्री महादेव जनता मा.वि हरिवन बाट सहभागी बिभु भट्टराई र दृष्टि दास तत्माको समुहले प्रथम स्थान हासिल गरेको थियो भने प्रतिस्पर्धामा ज्ञानोदय सेकेन्डरी स्कुल बयलबास बाट   सहभागी अरमान मिकरानी र सुस्मिता कुशवाहको समुह द्धितिय, सर्लाही एम्विसन एकेडेमिबाट सहभागी सरोज जिम्बा र श्री स्वयता भण्डारीको समुह तृतीय र श्री जानकी मा।वि लालबन्दीबाट सहभागी पुरुषोत्तम कुमार कुशवाह र रिया खड्काको समुहले सान्त्वना स्थान हासिल गरेको थियो । 

प्रतियोगितामा प्रथम, द्धितीय, तृतीय, र सान्त्वना पुरस्कार क्रमशः रु ६६६६, रु ५३३३, रु ४००० तथा रु २६६६ राखिएको थियो ।