काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को तर्फबाट भूमि व्यवस्था, सहकारी तथा गरिबी निवारण मन्त्रालयका नवनियुक्त सचिव अर्जुन प्रसाद पोखरेललाई हार्दिक बधाई तथा कार्यकाल सफलताको शुभकामना व्यक्त गरिएको छ ।

नेफ्स्कूनका अध्यक्ष चन्द्रप्रसाद ढकालले आज भूमि व्यवस्था, सहकारी तथा गरिबी निवारण मन्त्रालयका नवनियुक्त सचिव अर्जुन प्रसाद पोखरेललाई भेटी संघसँगै समग्र अभियानको तर्फबाट हार्दिक बधाईसँगै कार्यकाल सफलताको शुभकामना व्यक्त गर्नुभएको हो । भेटमा सहकारी विभागका रजिष्ट्रार पिताम्बर घिमिरे पनि सहभागी हुनुहुन्थ्यो ।

उक्त भेटमा अध्यक्ष ढकालले सहकारी अभियानको समसामयिक विषयमा सचिव पोखरेललाई जानकारी गराउनुभएको थियो । अध्यक्ष ढकालले भन्नुभयो, ‘सचिवज्यूले अभियानको विषयसँगै नेफ्स्कूनको बारेमा मैले राखेको कुराहरु अत्यन्त अभिरुचिपूर्वक सुन्दै मन्त्रालय र सहकारी अभियानबीच निकट र सौहार्दपूर्ण सम्बन्धबाटै सहकारी क्षेत्रका समस्याहरु सम्बोधन गरी विकास र समृद्धि हासिल गर्न सकिने धारणा राख्नुभयो ।’

अध्यक्ष ढकालले सहकारीमा लाग्ने आयकरलाई विद्यमान सहकारी ऐन अनुरुप कायम गर्नुपर्ने विषयदेखि बचत तथा ऋण सहकारी संस्थासम्बन्धी स्थिरीकरण कोष लगायतका सममायिक विषयमा सचिवलाई अवगत गराउनुभएको थियो ।

सचिव पोखरेलले यावत् विषयसँगै समग्र साकोस अभियानका सम्बन्धमा चाँडै नेफ्स्कूनको टीमसँग बसेर विस्तृत छलफल गर्ने जानकारी गराउनुभएको अध्यक्ष ढकालले बताउनुभयो ।