काठमाडौं । एशियाली ऋण महासंघ (अकू) को आयोजनामा सेप्टेम्बर ५ देखि ७ (भदौं २० देखि २२) सम्म इन्डोनेसियाको बालीमा आयोजना हुने ‘एशियन क्रेडिट युनियन फोरम– २०२४’ मा कार्यपत्र प्रस्तुतिका लागि नेफ्स्कूनका प्रमुख कार्यकारी अधिकृत (सिईओ) डा.शिवजी सापकोटा आज त्यसतर्फ जाँदै हुनुहुन्छ । फोरमको अघि सेप्टेम्बर २ देखि ४ सम्म हुने सिईओ वर्कशपमा समेत उहाँ सहभागी हुनुहुनेछ ।

यसैबीच, नेफ्स्कूनका बरिष्ठ उपाध्यक्ष दामोदर अधिकारी सहित सहायक कार्यकारी अधिकृतहरु लगायतले उहाँलाई आज एक संक्षिप्त कार्यक्रमसहित बिदाइ गर्नुभएको छ । बरिष्ठ उपाध्यक्ष अधिकारीले नेपाली साकोस अभियानको तर्फबाट गरिने प्रस्तुती, फोरमका सिलसिलामा हुने साइडलाइन बैठकहरुसँगै समग्रमा कार्यक्रम सफलताको शुभकामनासहित सिईओ डा. सापकोटालाई बिदाई गर्नुभएको हो । बरिष्ठ उपाध्यक्ष अधिकारीले यस्ता अन्तर्राष्ट्रिय भ्रमणहरु सिकाइको प्रभावकारी प्लेटफर्म हुने भन्दै यो पटकको फोरमकको सिकाइ नेपाली साकोस अभियानका लागि पनि विगतका मञ्चहरु भन्दा अझै बढी उपलब्धीमूलक हुने विश्वास व्यक्त गर्नुभयो ।

यसैगरी, संघका सिईओ डा. सापकोटाले पनि अकू फोरममा एशिया प्रशान्त क्षेत्रीय क्रेडिट युनियन अभियानबारे मात्र नभई, नेपालको साकोस अभियानको प्रस्तुति तथा विश्व अभियानका समसामयिक विषयहरुमा पनि विषयविज्ञहरुबाट प्रस्तुति, छलफल र मन्थनसहित निष्कर्ष निकाल्ने कार्यक्रम भएकाले नेपालको अभियानका लागि धेरै नै लाभदायक हुने दाबी गर्नुभयो ।

फोरममा संघका सिईओ डा. सापकोटाले क्रेडिट युनियनको भावी कार्यदिशा तय गर्ने विषयमा बहसपैरवी तथा नियामकीय संरचनाको महत्वबारे प्रस्तुतीकरण गर्नुहुनेछ ।  उहाँले Shaping the Future of Credit Union Movements: Policy Advocacy and Regulatory Frameworks  विषयमा प्रस्तुतीकरण गर्नुहुने कार्यक्रम छ । सोही सत्रमा उहासँगै अफ्रिकन कनफेडेरेशन अफ कोअपरेटिभ अफ सेभिङ्स एण्ड क्रेडिट एशोसिएसन्सका सिईओ जर्ज ओम्बाडाले पनि प्रस्तुती गर्नुहुनेछ । उत्र सत्रको सहजीकरण फिलिपिन्सका डिभेलपमेन्ट एजुकेशटर बेट्सी जोई टानले गर्नुहुने कार्यक्रम छ । 

यसैबीच, भदौं २३ गते (सेप्टेम्बर ८) मा अकूको वार्षिक साधारण सभा समेत आयोजना हुँदैछ ।