अन्तर्राष्ट्रिय सहकारी दिवस २०२५, ३१ औं संयुक्त राष्ट्र संघीय अन्तर्राष्ट्रिय सहकारी दिवस तथा ३२ औं राष्ट्रिय सहकारी महासंघ दिवसको अवसरमा सम्पूर्णमा शुभकामना व्यक्त गर्दछु । अन्तर्राष्ट्रिय सहकारी दिवसको थिमले सहकारीहरुको लोकतान्त्रिक स्वभाव, सदस्यतामा आधारित संरचना र समुदाय केन्द्रित दृष्टिकोणलाई प्रतिनिधित्व गरेको छ । दिवसको थिम सम्बन्धमा रजिष्ट्रारज्यूबाट पनि धेरै विषयहरु प्रस्तुत भए । 

आज विश्वभर विविध कार्यक्रम गरि यो दिवस मनाईंरहँदा र ३२औं राष्ट्रिय सहकारी महासंघ दिवस पनि एकसाथ मनाईरहँदा हामीले सहकारी अभियानको प्रवर्द्धन र विकासमा केही प्रतिबद्धताहरु पनि व्यक्त गरेर जानुपर्छ भन्ने मलाई लाग्छ । ३१ बर्षको समय छोटो समय होईन, हामीले दिवस मनाईंरहँदा यस अवधिसम्म के कति उपलब्धी हासिल गरियो भन्ने कुराको पनि समिक्षा गर्नु जरुरी छ । हामीलाई लाग्छ अभियानमा धेरै गरेका छौं, तर आफू सहकारी पद्दतिमा बसेर अरुलाई सहकारीको पद्दतिभित्र हिड्न कति सिकायौं भन्ने कुराले प्रमुखता राख्छ । नेतृत्वमा रहेको बेला अभियानमा राम्रो काम गरेर देखाउने बेला हो । नेतृत्वकालमा के कति नतिजामुखि काम गर्न सकियो भन्ने कुराको समिक्षा र अब गरिने कामका लागि प्रतिबद्धता आवश्यक हुन्छ ।  

म कानुनको विद्यार्थी हो । कानुनको सम्मान र पालना गर्नुपर्छ भन्नेमा पूर्ण विश्वस्त पनि छु । तर हामीले सहकारी अभियानभित्र ऐनको परिपालना गर्न कति सक्यौं भन्ने मुल प्रश्न हो । ऐन पालना नगर्दा त्यसको असर के पर्यो, यो पनि समिक्षा गरौं । हामीले आत्मसाथ गर्नुपर्छ सहकारी ऐन, २०७४ को पालनामा कहाँ चुक्यौं ? यसको प्रभाव आज हामीले के भोगिरहेका छौं ? त्यसको आत्मसाथ गर्ने दिन पनि हो आज । 

हामी सबै कुनै न कुनै जिम्मेवारीमा छौ । हामीलाई जिम्मेवारीमा पठाउनेहरुको आत्मसम्मानमा आँच आउने काम गरेर अपमान गर्ने छुट कानुनले हामीलाई दिएको छैन । कानुनको उलंघन गरियो भनेर आफूलाई बाहादुरी ठान्ने काम नगरौं, सबैको नजर हामीतिर छ । परिवार, समाज र कानुन सँग थोरै भए पनि डरायर आफ्ना जिम्मेवारीहरु पुरा गर्न तर्फ आजबाटै लाग्यौं भने अन्तर्राष्ट्रिय तथा राष्ट्रिय सहकारी दिवसप्रति सच्चा प्रतिबद्धता हुनेछ । 

आज सहकारी नियमन प्राधिकरण बनेको छ । यसले सहकारीको संरक्षण र प्रवर्द्धनमा काम गर्छ भन्नेमा पनि हामी पूर्ण विश्वस्त हुनुपर्छ । 

नेफ्स्कूनका अध्यक्ष चन्द्र प्रसाद ढकालले अन्तर्राष्ट्रिय सहकारी दिवसका अवसरमा शनिवार आयोजित कार्यक्रममा राख्नुभएको विचारको सम्पादित अंश ।