काठमाडौं ।  गुराँस गाउँपालिका वडा नंं. ४, दैलेखमा रहेको जनसेवक बचत तथा ऋण सहकारी संस्था लि. का सदस्यहरुले बचत खेल तालिम 'Savings Game' लिएका छन् । जनसेवक साकोसको आयोजना र जर्मन स्पार्कसेन्स्टिफ्टुङ्ग (German Sparkassenstiftung) को सहयोग तथा नेपाल बचत तथा ऋण केन्द्रीय सहकारी संघ लि.(नेफ्स्कून) को प्राविधिक सहजीकरणमा सञ्चालित दुई दिवसीय बचत खेल तालिम श्रावण १६ गते सम्पन्न भएको हो ।

साकोसका सेयर सदस्यहरुलाई लक्षित गरि आयोजना गरिएको तालिमले सदस्यहरुमा वित्तीय साक्षरता र सशक्तिकरणप्रति जागरुग बनाउने विश्वास रहेको साकोसले जनाएको छ । श्रावण १५ र १६, दुई दिनसम्म सञ्चालित बचत खेल तालिमले सदस्यहरुमा बचत व्यवहार, वित्तीय योजना र समूह गतिशीलतामा व्यावहारिक अन्तर्दृष्टि प्रदान गर्ने काम गरेको छ । 

तालिम प्रशिक्षकका रुपमा नेफ्स्कूनका कार्यक्रम अधिकृत शौभाग्य भट्टराई र व्यवसाय अधिकृत सुमनराज घिमिरेले सहजिकरण गर्नुभएको थियो । साकोसका शिक्षा उपसमिति संयोजक भिम बहादुर बि.सी.को अध्यक्षतामा सम्पन्न तालिममा साकोसका अध्यक्ष, उपाध्यक्ष, लेखा सुपरिवेक्षण समितिका संयोजक तथा सञ्चालक समितिका सदस्यहरु सहित ३३ जना सेयर सदस्यहरुको सहभागिता रहेको व्यवस्थापक विपिन गुरुङ्गले जानकारी गराउनुभयो । 

तालिमको मुख्य उद्देश्य सदस्यहरुमा वित्तीय साक्षरता अभिवृद्धि गर्नुका साथै उनीहरुलाई व्यवहारिक रूपमा बचत र खर्च व्यवस्थापनका सिप बारे प्रशिक्षित गराउनु हो ।