सुर्खेत । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सुर्खेतको बिरेन्द्रनगर २, कोलडाँडा, स्थित पूर्ण सक्रिय समाज बचत तथा ऋण सहकारी संस्था लिमिटेडको स्थलगत सुपरिवेक्षण असोज ३० गते सम्पन्न गरेको छ । सुपरिवेक्षण नेफ्स्कूनद्वारा सञ्चालित नियमित निरीक्षण तथा अनुगमन कार्यक्रम (स्क्यान) अन्तर्गत गरिएको हो ।

नेफ्स्कूनले देशभरका आफ्ना सदस्य सहकारी संस्थाहरूमा पारदर्शिता, उत्तरदायित्व, सदस्य हितको सुनिश्चितता, जोखिम न्यूनीकरण, सुशासन र दीगो सञ्चालन प्रवद्र्धनका लागि नियमित रूपमा स्थलगत अनुगमन कार्यक्रमहरू सञ्चालन गर्दै आएको छ । यसै क्रममा पूर्ण सक्रिय समाज साकोसमा गरिएको अनुगमनले संस्थाको विनियम, आन्तरिक कार्यविधि, कर्जा तथा बचत सेवा, ब्याजदर, वार्षिक योजना, सम्पत्ति शुद्धिकरण निवारण नीति, नियामक निकायका निर्देशनको कार्यान्वयन स्थिति,भाखा नाघेका ऋण असुली, पूँजी प्रयाप्तता अनुपात र समग्र आर्थिक स्थिति लगायतका पक्षहरूको विस्तृत मूल्यांकन गर्दै आएको हो ।  

अनुगमनका क्रममा सहकारीको आर्थिक तथा प्रशासनिक प्रणाली, सेवा गुणस्तर, सदस्य सन्तुष्टि र जोखिम व्यवस्थापनका पक्षमा अध्ययन गर्दै कानुनी, वित्तीय, ऋण, तरलता तथा सञ्चालन र सुशासन सम्बन्धी जोखिमहरू न्यूनीकरणका लागि सुधारात्मक सुझावहरू प्रदान गरेको थियो । 

संघको तर्फबाट स्थलगत अनुगमनमा कार्यक्रम अधिकृत प्रविण अधिकारी र मदन कुमार चन्द सहभागी रहेका थिए । साकोसका अध्यक्ष शंकर बहादुर अधिकारी, उपाध्यक्ष लक्ष्मी अधिकारी, कोषाध्यक्ष भीमसेन अधिकारी, सदस्य ललिता फडेरा, प्रबन्धक लछिराम बुदा, सहायक प्रबन्धक विजय अधिकारी लगायत व्यवस्थापन टिमका अन्य कर्मचारीहरू उपस्थिति रहेको थियो । बैठकका क्रममा सहकारीको कार्यप्रणाली सुदृढ पार्ने उद्देश्यले नेफ्स्कूनद्वारा प्रस्तुत सुधारका सुझावहरूलाई कार्यान्वयन गर्ने सहमति जनाइएको छ । यस्ता अनुगमन तथा सुपरिवेक्षण कार्यक्रमहरूले सहकारी संस्थाहरूमा सुशासन, पारदर्शिता र सदस्य हित प्रवद्र्धनमा सकारात्मक प्रभाव पारिरहेको साकोसले जनाएको छ ।