कञ्चनपुर । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) द्वारा संचालित नियमित निरिक्षण तथा अनुगमन कार्यक्रम अन्तर्गत सृजना बचत तथा ऋण सहकारी संस्था लिमिटेड, दोधारा चाँदनी–४, कञ्चनपुर को स्थलगत सुपरिवेक्षण कार्तिक २५ गते सम्पन्न भएको छ।

सुपरिवेक्षणका क्रममा सहकारी संस्थाको सदस्यता व्यवस्थापन, लेखा परीक्षण, वित्तीय विवरण, सम्पत्ति व्यवस्थापन, MIS अद्यावधिक तथा शासन प्रणाली लगायतका विषयहरूमा मूल्यांकन गरी सुधारका लागि सिफारिसहरू पेश गरिएको छ।

नेफ्स्कूनका कार्यक्रम अधिकृत प्रबिण अधिकारीको सहजीकरण र संस्थाको संचालक समिति, प्रोबेशन कार्यदल तथा ब्यबस्थापनको उपस्थितिमा गरिएको स्थलगत निरीक्षणमा संस्थागत सुदृढीकरण, वित्तीय पारदर्शिता, सुशासन, सदस्य हित सुनिश्चितता, जोखिम व्यवस्थापन र आन्तरिक नियन्त्रण प्रणालीका पक्षहरूमा विशेष ध्यान दिइएको थियो। 

अनुगमन टोलीले संस्थाको नियमावली, कर्जा तथा बचत कार्यक्रम, ब्याजदर, लेखा प्रणाली, सम्पत्ति शुद्धिकरण निवारण नीति, नियामक निकायका निर्देशनको कार्यान्वयन, तथा भाखा नाघेका ऋण असुलीको अवस्था समेत समीक्षा गरेको छ। समीक्षाको क्रममा सहकारीको समग्र कार्यप्रणाली अध्ययन गरी संस्थागत सुधारका लागि विभिन्न व्यावहारिक सुझाव र सिफारिसहरू प्रस्तुत गरिएको छ। साथै, अघिल्ला अनुगमनमा दिइएका सुझावहरूलाई प्रोबेशन कार्यदलमा विस्तृत छलफल गरी सञ्चालक समितिमा पेस गरी कार्यान्वयन गर्न सिफारिस गरिएको छ।

संस्थाले यस्ता अनुगमन तथा सुपरिवेक्षण कार्यक्रमहरूले सहकारीहरूको कार्यदक्षता, पारदर्शिता, सुशासन र जोखिम न्यूनीकरणमा महत्वपूर्ण योगदान पुर्‍याइरहेको जनाएको छ ।