सिन्धुपाल्चोक। नेपाल बचत तथा ऋण केन्द्रीय सहकारी संघ लि.(नेफ्स्कून) ले सञ्चालनमा ल्याएको  स्क्यान कार्यक्रममा सिन्धुपाल्चोक जिल्लाबाट पहिलो पटक लामोसाँघु बचत तथा ऋण सहकारी संस्था लि. आबद्ध भएको छ। मंसिर २२ गते संस्थाले औपचारिक रूपमा कार्यक्रमसँग आबद्धताको घोषणा गरेको हो।

सहकारी ऐन २०७४ को दफा ९९ मा व्यवस्था भए बमोजिम संघद्धारा शुरुवात गरिएको यस कार्यक्रमले संघका सबै सदस्य संघ संस्थाहरुलाई अनुगमन तथा निरिक्षण गरी आवश्यक मार्गदर्शन प्रदान गर्ने उद्देश्य राखेको छ । 

२०६५ साल असार ११ गते स्थापना भएको लामोसाँघु साकोसमा हाल ३३३१ जना शेयर सदस्य रहेका छन् भने ८ जना कर्मचारी कार्यरत छन्। यस संस्थाले आफ्नै भवनबाट सदस्य राहत सेवाअन्तर्गत ऋणी बीमा, दुर्घटना बीमा, सुत्केरी–शिशु स्याहार, दैवी प्रकोप राहत, सामाजिक उत्तरदायित्व कार्यक्रम, रेमिट्यान्स तथा युटिलिटी पेमेन्टलगायतका सेवाहरू प्रदान गर्दै आएको छ।

सम्झौता कार्यक्रममा साकोसका अध्यक्ष पुर्णचन्द्र ढकाल, व्यवस्थापक रविन वि.क., सचिव नेत्र प्रसाद पराजुली तथा नेफ्स्कूनका कार्यक्रम अधिकृत राजन सुवेदी को उपस्थितिमा सम्झौता सम्पन्न भएको थियो।