जनकपुर  । नेपाल बचत तथा ऋण केन्द्रीय सहकारी संघ लि. (नेफ्स्कून) जनकपुर  सदस्य सेवा कार्यालयको आयोजनामा राष्ट्रिय सहकारी नियमन प्राधिकरण सम्बन्धी दर्ता तथा अभिलेखीकरण कार्यक्रम जनकपुरमा पौष २९ गते सम्पन्न भएको छ ।  

कार्यक्रममा धनुषा  जिल्लाका २५ वटा सहकारी संस्थाबाट ३० जना प्रतिनिधिहरूको सहभागिता रहेको थियो । कार्यक्रममा सहकारी संस्थाहरूलाई राष्ट्रिय सहकारी नियमन प्राधिकरणमा दर्ता तथा अभिलेखीकरण प्रक्रिया सम्बन्धी आवश्यक जानकारी प्रदान गरिएको थियो ।

कार्यक्रमको सहजिकरण नेफ्स्कून सदस्य सेवा कार्यालय जनकपुरका प्रमुख राजेन्द्र ढकाल र  सहजकर्ता रम्भु पंडितले गर्नुभएको थियो । दर्ता प्रक्रियाको महत्व, आवश्यक कागजात, र अभिलेखीकरण गर्दा ध्यान दिनुपर्ने विषयहरूबारे प्रष्ट पार्नुभएको थियो ।

कार्यक्रमको व्यवस्थापन जनकपुर  सदस्य सेवा कार्यालयले गरेको थियो भने कार्यक्रमले सहकारी संस्थाहरूलाई नियमनको दायराभित्र ल्याउन तथा सहकारी क्षेत्रलाई सुदृढ बनाउन महत्वपूर्ण योगदान पुर्याउने अपेक्षा गरिएको छ ।