भक्तपुर । सहकारी क्षेत्रमा सुशासन तथा सदस्यको बचत सुरक्षालाई प्रमुख चुनौतीका रूपमा हेरिँदै आएको सन्दर्भमा भक्तपुरको मध्यपुर थिमि नगरपालिका–२ स्थित पवित्र हलेशीधाम बचत तथा ऋण सहकारी संस्था लिमिटेडमा नेफ्स्कूनले ‘स्क्यान’ कार्यक्रम अन्तर्गत चैत्र ०८ गते स्थलगत सुपरीवेक्षण सम्पन्न गरेको छ ।

सुपरीवेक्षणमा नेफ्स्कूनका कार्यक्रम अधिकृत सुमनराज घिमिरे तथा अनुगमन सहजकर्ता नमुना सापकोटाको सहभागिता रहेको थियो । उक्त टोलीले संस्थाको वित्तीय अवस्था, जोखिम व्यवस्थापन तथा कानुनी पालना सम्बन्धी अवस्थाको गहन अध्ययन गरेको थियो ।

सुपरीवेक्षणका क्रममा संस्थाको आन्तरिक नियन्त्रण प्रणालीलाई थप प्रभावकारी बनाउने विषयमा विशेष ध्यान दिँदै विभिन्न पक्षहरूको समीक्षा गरिएको थियो । विशेषगरी डिजिटल सुशासन र पारदर्शिता अन्तर्गत कोपोमिस प्रणालीमा तथ्याङ्क प्रविष्टिको अवस्था, गोएमएल प्रणाली मार्फत सम्पत्ति शुद्धीकरण निवारणको प्रभावकारिता, सम्पत्ति तथा दायित्व व्यवस्थापनको वैज्ञानिक विश्लेषण, तथा सदस्य केन्द्रित सेवाअन्तर्गत साधारण सभाको गुणस्तर र कार्यालय व्यवस्थापनको आधुनिक स्वरूपबारे मूल्याङ्कन गरिएको थियो ।

सुपरीवेक्षण पश्चात आयोजित रणनीतिक छलफल कार्यक्रममा कार्यक्रम अधिकृत घिमिरेले संस्थाका सबल पक्षहरू र सुधार गर्नुपर्ने क्षेत्रहरूबारे प्रस्तुति दिनुभयो। उहाँले पहिचान गरिएका सुझावहरूलाई प्रभावकारी रूपमा कार्यान्वयन गर्न स्पष्ट सुधार कार्ययोजना आवश्यक रहेकोमा जोड दिनुभयो ।

उक्त अवसरमा संस्थाका सञ्चालक समिति तथा व्यवस्थापन टोलीले प्राप्त सुझावहरूका आधारमा तत्काल सुधार कार्ययोजना तयार गरी कार्यान्वयनमा लैजाने प्रतिबद्धता व्यक्त गरेको छ । सहकारीप्रति सदस्य तथा समुदायको विश्वास अभिवृद्धि गर्ने लक्ष्यसहित संस्थाले स्वनियमन, आन्तरिक नियन्त्रण प्रणाली तथा वित्तीय अनुशासनलाई प्राथमिकतामा राख्दै अघि बढ्ने जनाएको छ । यस किसिमका पहलहरूले समग्र सहकारी अभियानमा सकारात्मक सन्देश प्रवाह हुने अपेक्षा गरिएको छ ।