धादिङ । बचत तथा ऋण सहकारी संस्थाहरूको संस्थागत सुदृढीकरण, जोखिम न्यूनीकरण तथा प्रभावकारी व्यवस्थापन प्रणाली विकास गर्ने उद्देश्यले नेफ्स्कूनको आयोजनामा “साकोस जोखिम व्यवस्थापन ३६०” कार्यशाला वैशाख २५ गते सम्पन्न भएको छ ।

नियमित निरीक्षण तथा अनुगमन कार्यक्रम (स्क्यान) अन्तर्गत नवौं क्लस्टर (पहिलो) को दोस्रो चरणका रूपमा आयोजना गरिएको उक्त कार्यशालामा गोरखा र धादिङ जिल्लास्थित साकोसका २५ जना प्रतिनिधिहरूको सहभागिता रहेको थियो । कार्यशालामा सहभागीहरूले सहकारी संस्थामा देखिन सक्ने सम्भावित जोखिमहरूको पहिचान, न्यूनीकरणका उपाय तथा दिगो व्यवस्थापन प्रणालीबारे विस्तृत रूपमा छलफल गरेका थिए ।

कार्यशालामा विशेषगरी स्क्यान कार्यक्रमका सूचकहरूबारे गहन समीक्षा भएको थियो । सहभागीहरूबीच ऋण व्यवस्थापन प्रणालीलाई थप प्रभावकारी बनाउने उपाय, सदस्यहरूको बचत सुरक्षाको अवस्था, संस्थागत सुशासन, आन्तरिक नियन्त्रण प्रणाली तथा वित्तीय अनुशासन कायम गर्ने विषयमा अनुभव आदानप्रदान गरिएको थियो ।

सहकारी संघ तथा नियामक निकायमा नियमित रूपमा पेश गर्नुपर्ने विवरण, प्रतिवेदन तथा अभिलेख व्यवस्थापनलाई व्यवस्थित र पारदर्शी बनाउने विषयमा समेत विस्तृत छलफल भएको थियो । तरलता व्यवस्थापन योजना, सम्भावित वित्तीय संकटबाट बच्ने रणनीति, संस्थागत स्थायित्व कायम गर्ने उपाय तथा सदस्यहरूको विश्वास अभिवृद्धि गर्ने विषयमा समेत सहभागीहरूबीच सामूहिक प्रतिबद्धता व्यक्त भएको थियो ।

सहकारी क्षेत्रलाई थप व्यवस्थित, सुरक्षित र उत्तरदायी बनाउन यस्ता क्षमता अभिवृद्धि मूलक कार्यक्रम प्रभावकारी हुने धारणा व्यक्त गरेका थिए, सहभागीहरूले सिकाइ तथा अनुभवलाई आफ्ना संस्थाहरूमा व्यवहारिक रूपमा कार्यान्वयन गर्ने प्रतिबद्धता समेत जनाएका छन् ।

कार्यशालाको सहजीकरण नेफ्स्कूनका सहायक कार्यकारी अधिकृत दुर्गा प्रसाद ढकाल र अधिकृत सन्दिप राज ढकालले गर्नुभएको थियो । सहजीकरणका क्रममा सहकारी संस्थाहरूको वर्तमान अवस्था, जोखिम व्यवस्थापनको आवश्यकता, संस्थागत सुशासन तथा दीर्घकालीन स्थायित्वका लागि अपनाउनुपर्ने व्यावहारिक उपायहरूबारे प्रशिक्षणमूलक प्रस्तुति दिनुभएको थियो ।

कार्यशालाले सहभागी साकोसहरूबीच अनुभव आदानप्रदान, सहकार्य अभिवृद्धि तथा जोखिम व्यवस्थापन सम्बन्धी साझा बुझाइ विकास गर्न महत्वपूर्ण योगदान पु¥याएको आयोजकले जनाएको छ ।