पोखरा, कास्की । पोखरा महानगरपालिका–९ स्थित मुनाल बचत तथा ऋण सहकारी संस्था लिमिटेडमा नेफ्स्कूनद्वारा सञ्चालित नियमित निरीक्षण तथा अनुगमन (स्क्यान) कार्यक्रम अन्तर्गत स्थलगत सुपरिवेक्षण जेठ ११ गते सम्पन्न भएको छ ।

नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी संस्थाहरूको पारदर्शिता, उत्तरदायित्व, सदस्य हितको सुनिश्चितता, जोखिम न्यूनीकरण, सुशासन तथा दिगोपना अभिवृद्धिका लागि स्थलगत अनुगमन अभियानलाई अघि बढाएको हो ।

सुपरिवेक्षणका क्रममा संस्थाको स्तरीकरणका लागि विभिन्न प्राविधिक तथा वित्तीय सूचकहरूमाथि गहन मूल्याङ्कन गरिएको थियो । जस अन्तर्गत संस्थाको बचत, ऋण, ब्याजदर, वार्षिक योजना, सम्पत्ति शुद्धीकरण निवारण नीतिको पालना, नियामक निकायहरूबाट जारी निर्देशनहरूको परिपालना, भाखा नाघेको ऋण असुलीको अवस्था लगायत समग्र आर्थिक परिसूचक र सदस्यहरूलाई उपलब्ध गराइएका सेवा सुविधाहरूको विस्तृत निरीक्षण गरिएको थियो ।

स्थलगत सुपरिवेक्षण पश्चात् नेफ्स्कूनका कार्यक्रम अधिकृत मनोज खड्काले अनुगमनका क्रममा प्राप्त निष्कर्ष तथा सुधारका क्षेत्रहरूका बारेमा जानकारी गराउनुभएको थियो । नेफ्स्कूनद्वारा दिइएका रचनात्मक सुझावहरूलाई आत्मसात् गर्दै संस्थालाई थप सुधारोन्मुख र सुशासित बनाउँदै लैजाने निर्णय र प्रतिबद्धता मुनाल साकोस व्यवस्थापन तथा सञ्चालक समितिको तर्फबाट व्यक्त भएको छ ।