बारा । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले नियमित निरीक्षण तथा अनुगमन कार्यक्रम (स्क्यान) अन्तर्गत रोयल बचत तथा ऋण सहकारी संस्था लिमिटेड, बाराको स्थलगत सुपरिवेक्षण जेठ १२ गते सम्पन्न गरेको छ । 

सहकारी क्षेत्रमा सुशासन, दिगोपन र वित्तीय अनुशासन प्रर्वद्धन गर्ने उद्देश्यका साथ नेफ्स्कूनले नियमित स्थलगत सुपरिवेक्षण कार्यलाई निरन्तरता दिएको हो । 

सुपरिवेक्षणको मुख्य उद्देश्य सहकारीहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु र बचतकर्तामा विश्वास अभिवृद्धि गर्नु रहेको जनाइएको छ । 

निरीक्षणका क्रममा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षण, सम्पत्ति शुद्धिकरण निवारण नीति (AML/CFT) र भाखा नाघेका ऋण असुलीका विषयहरूमा केन्द्रित रही समग्र अवस्थाको मूल्यांकन गरिएको थियो । 

सुपरिवेक्षण कार्यक्रममा नेफ्स्कूनका कार्यक्रम अधिकृत महेश वराल र रोयल बचत तथा ऋण सहकारी संस्थाका अध्यक्ष, सचिव, कोषाध्यक्ष, सञ्चालक सदस्य लगायत उच्च व्यवस्थापन तहका कर्मचारीहरूको सहभागिता रहेको थियो ।