कास्की ।  कास्की, माछापुच्छ्रे गा.पा. २, भुर्जुङखोला स्थित सार्दिखोला बचत तथा ऋण सहकारी संस्था लिमिटेडको आयोजना तथा नेपाल बचत तथा ऋण केन्द्रीय सहकारी संघ लि.(नेफ्स्कून) को प्राविधिक सहयोगमा साउन २६ गतेदेखि २८ गतेसम्म सञ्चालन भएको तीनदिने कृषक व्यवसायिक खेल तालिम सम्पन्न भएको छ ।

तालिमको सहजीकरण नेफ्स्कून कार्यक्रम अधिकृत मनोज खड्का तथा पोखरा सदस्य सेवा कार्यालय प्रमुख सुरज चालिसेले गर्नुभएको थियो । कार्यक्रमको सञ्चालन संस्थाका सचिव सपना कुमारी गुरुङले गर्नुभएको थियो भने स्वागत मन्तव्य प्रमुख कार्यकारी अधिकृत गोबिन्द आचार्यले गर्नुभएको थियो ।

संस्थाका ३० जना शेयर सदस्यहरूको सहभागितामा सञ्चालित तालिममा संस्थाको तर्फबाट अध्यक्ष, उपाध्यक्ष, सचिव, सञ्चालक सदस्य तथा उच्च व्यवस्थापनको समेत उपस्थिति रहेको थियो ।

तीन दिनसम्म सञ्चालन भएको तालिममा सहभागीहरूले उत्साहपूर्ण सहभागिता जनाउँदै कृषि व्यवसायलाई अझ व्यवस्थित, व्यवसायमुखी र दिगो बनाउने विषयमा ज्ञान तथा सीप हासिल गरेको साथै तालिमबाट सिकेका ज्ञान, सीप र अभ्यासलाई आफ्नै कृषि व्यवसायमा प्रयोग गर्ने, आय–व्यय तथा हिसाब–किताबलाई व्यवस्थित रूपमा अभिलेखीकरण गर्ने तथा कृषि व्यवसायलाई योजनाबद्ध ढंगले सञ्चालन गर्ने प्रतिबद्धता व्यक्त गरेका थिए ।

समापन समारोहलाई सम्बोधन गर्दै संस्थाका अध्यक्ष गिरिधारी आचार्यले यस्ता तालिमहरूले सदस्यहरूलाई उत्पादनमुखी कृषि व्यवसायतर्फ प्रेरित गर्नुका साथै आधुनिक व्यवस्थापन प्रणाली अपनाउन सहयोग पुग्ने विश्वास व्यक्त गर्नुभयो ।