अन्तर्राष्ट्रिय सहकारी महासंघको एशिया प्रशान्त क्षेत्रीय कार्यालय (आईसीए–एपी) ले ICA Asia-Pacific Cooperative Excellence Awards प्रदान गर्ने घोषणासहित आवेदन माग गरेको छ ।  

सहकारी क्षेत्रको विकास र प्रवर्धनमा उल्लेखनीय योगदान पुर्याउने एशिया प्रशान्त क्षेत्रका अभियन्ता, सहकारी संस्था साथै नियमनकारी निकायलाई सम्मानित गर्ने उद्देश्यसहित  पहिलो पटक पुरस्कार स्थापना गरिएको आईसीए एपीले जनाएको छ । ‘प्रेरणादायी सहकारी व्यक्तित्व’, ‘उद्यमशील सहकारी सम्मान’ तथा ‘सहयोगी नियामक निकाय’ गरी तीन शीर्षकमा सम्मान प्रदान गरिने जनाइएको छ । आईसीए एपीले उत्कृष्ट सहकारीकर्मी, उत्कृष्ट संस्था र उत्कृष्ट नियामक निकाय गरी तीन क्षेत्रलाई समेटेर सम्मानको परम्परा थालनी गरेको हो । आईसीए एपीले तीनै विधाको सम्मानका लागि योग्यहरुको छनोट गरी आवेदन दिन आग्रह गरेको छ । 

अनलाइन आवेदनको समयावधि आगामी अगष्ट ३१ सम्म रहेको छ भने सम्मान घोषणा आगामी नोभेम्बर ८ मा फिलिपिन्सको राजधानी मनिलामा आयोजना हुने १६औं आइसिए एपी क्षेत्रीय सम्मेलनको अवसरमा गरिने छ । 

विश्व भरका सहकारीहरुको छाता संगठन आईसीएका हाल ४ क्षेत्रीय कार्यालय रहेका छन् जसमध्ये आईसीए एपीको कार्यालय भारतको राजधानी नयाँ दिल्लीमा रहेको छ । आईसीए एपीमा हाल ३२ राष्ट्रका १ सय ४ सहकारी संघ संस्थाहरु सदस्य छन् ।